Reseña literaria: "De la movilización a la Guerra Civil. Historia política y social de Gijón (1900-1937)"

RADCLIFF, Pamela Beth, De la movilización a la Guerra Civil. Historia política y social de Gijón (1900-1937), Ed. Debate, Barcelona, 2004, 456 pp.

Javier Cubero de Vicente

Los republicanos hablaban de orquestar la integración de las masas en un sistema político reformado, que borraría las barreras entre El Llano y la calle Corrida. Los anarquistas y los socialistas, en cambio, hablaban de polarización; su programa incitaba a los habitantes de El Llano a ocupar la calle Corrida, no a hacer las paces con ella. (p. 127).

Nesta obra l'autora, profesora de la Universidá de California en San Diego, somórguianos nel desendolcu de les múltiples formes de llucha y organización colectiva que nos primeros años del sieglu XX activaron distintos sectores col envís d'arrampuña-y el dominiu de la ciudá al Partíu Conservador. La visión del conflictu políticu que s'espón nin se llinda nin prioriza a la batalla partidista pol control de les instituciones sinón que, teniendo como elementu central el conceptu de hexemonía, entra nel «terreno más amplio de los valores públicos, la acción colectiva y la expresión simbólica» (p. 21). De fechu a lo llargo del llibru se nos introduz «en muchos escenarios diferentes, desde la fabrica y el ayuntamiento hasta el centro cultural, el barrio y las calles de la ciudad», afondando nes distintes variables de la siempres complexa realidá social cola cuenta de captar «la estructura cotidiana del poder tal como era vivida y respirada por hombres y mujeres corrientes», esto ye, les distintes modalidaes de llexitimidá política y autoridá social qu'operaben nel multidimensional espaciu de la sociedá civil acullá del ámbitu de l'alministración pública.

Dende estos presupuestos vamos viendo como ye esplicada l'articulación d'una movilización permanente dende una amplia heteroxeneidá socio-política al traviés de dos grandes corrientes: el reformismu republicanu burgués y el movimientu obreru revolucionariu. A pesar de les diferencies programátiques y estratéxiques, la compatibilidá al curtiu plazu de les sos respectives prioridaes táctiques (per un llau la introducción de reformes democrátiques nes instituciones municipales, y per otru, la organización y defensa sindicales de los proletarios nos medios llaborales) asina como'l calter restrictivu y represivu del sistema políticu de la Primer Restauración Borbónica facilitaron un marcu mui flexible d'interacción ente republicanismu y obrerismu, que basculaba ente la collaboración y la competencia. Asina foi desendolcándose un procesu d'activación política d'amplios sectores populares que si bien foi esitosu na confrontación col establishment caciquil, clerical y oligárquicu de la derecha conservadora, darréu fracasa na cristalización d'un consensu socialmente ampliu en redol a una mesma cultura política. Pa Radcliff la clave taría na incapacidá de les distintes tendencies opositores tanto pa configurar un marcu ideolóxicu común como pa imponer por sigo mesmes los sos respectivos proyectos y visiones de les rellaciones sociales dempués de 1931.

Nel capitulu I se realiza un aproximamientu a la situación de la ciudá nel añu 1900. La crisis del 98 anque en Xixón nun tuviera consecuencies polítiques inmediates por embargu si qu'abrió un espaciu nel que los sectores esquierdistes pudieron dir empecipiando a cuestionar la llexitimidá ideolóxica del status quo. Daquella la disidencia vertebrábase alredor de tres tipos de dinámiques: la educación alternativa, la fuelga y la protesta de consumu.

En primer llugar alcontrábase la intellingentsia republicana, que taba centrada na espansión d'una rede d'asociaciones culturales y educatives que sirvieren d'escueles de ciudadanía y valores cívicos col oxetivu d'integrar a los obreros nel so proyectu de modernización estructural, caracterizáu por fuertes enfotos industrializadores, democratizadores y secularizadores. Dempués taba remaneciendo un movimientu obreru de clase, dientro del cual socialistes y anarquistes se combatíen de manera xabaz pol control de los sindicatos, acusándose unos a otros d'oportunistes y criminales. A la fin taben les muyeres de clase obrera, escluyíes del sindicalismu pero non del espaciu públicu, qu'al traviés de redes informales de solidaridá vecinal organizaben motines de consumu, pero «lejos de representar una resaca pre-industrial, este modelo de acción colectiva fue importantísimo para la formación de lo que se iba convertir en uno de los más potentes centros de la cultura de oposición: el barrio de clase obrera» (p.70).

La obra d'equí p'alantre ta estructurada en cuatro grandes bloques temáticos, nel primeru son analizaos los distintos estilos de vida esistentes na ciudá, nel segundu ye espuesta la trayectoria de les diverses fuercies polítiques y sindicales de la oposición, nel terceru son estudiaos los distintos proyectos culturales que se desendolcaron y los espacios de sociabilidá qu'implicaben, y nel cuartu les pautes d'acción colectiva al traviés de les cuales se manifestaben la disidencia ideolóxica y el malcontentu popular.

Nos capítulos II y III s’esponen los factores estructurales (inseguridá económica, estabilidá demográfica y segregación espacial) que sirvieron de marcu a la organización de les rellaciones sociales dientro y ente los distintos barrios: asina por exemplu'l doble apartheid económicu y residencial de la mayoría popular favoreció la emerxencia del barriu obreru como unidá autónoma de sociabilidá cola consiguiente cristalización de los dos Xixones antagónicos nel imaxinariu colectivu.

Los capítulos IV y V tán dedicaos a la evolución de los partíos republicanos, dientro de los cualos destacaron dos corrientes: el posibilismu melquiadista, que progresivamente diría moviéndose cada vuelta más a la derecha, y el federalismu piimargallianu, l'únicu sector republicanu qu'ellaboró y defendió plantegamientos socializantes acullá de la concepción lliberal de la propiedá privada.

Na década de 1910 se produz la puxanza del Partíu Reformista, creáu oficialmente por Melquiades Álvarez en 1913, nel que converxen gran parte de los antiguos militantes del Partíu Lliberal (qu'en Xixón siempres tuvieron marxinaos del poder al tar monopolizada la rede caciquil polos conservadores d'Alejandro Pidal) y de los partíos republicanos decimonónicos, desencantaos unos y otros coles organizaciones históriques pola so ineficacia. Magar que Melquiades Álvarez se declaró dispuestu a collaborar cola Monarquía cola finalidá d'impulsar avances democráticos dende'l marcu establecíu, estremándose asina de la tradicional intransixencia roturista del republicanismu, por embargu pudo capitalizar políticamente la creciente movilización popular yá que como consecuencia de la permanente represión (detenciones de militantes esquierdistes, censura de prensa, zarru de llocales, etc.) se xeneró un espaciu de solidaridá unitaria en redol a la defensa de los derechos y llibertaes civiles, siendo ésti un terrén nel que podíen movese con gran facilidá los reformistes. Sicasí nos planos social y económicu el melquiadismu destacó por una gran indefinición programática llindándose a recoyer les «demandas de las élites financieras modernizantes para aumentar la ventaja competitiva de Gijón en la industria y el turismo» (p.142). Solamente los discípulos de Pi i Margall que constituyíen la organización decana, el Partíu Republicanu Democráticu Federal, esplicitaron un programa de reformes sociales en beneficiu de la clase obrera como la xornada d'ocho hores o l'abolición de les tases de consumu. De fechu tuvieron implicaos activamente nel movimientu obreru dándose casos de doble militancia na CNT, cola que caltuvieron una alianza frente al binomiu socialista PSOE-UGT.

Na dómina de la II República’l gobiernu municipal quedaría nes manes del melquiadismu, refundáu como Partíu Reformista Lliberal Democráticu en 1931. Nesta dómina'l mapa políticu xixonés diverxó radicalmente del asturianu al tar la ciudá dominada por dos sectores que a diferencia de tiempos pasaos agora yeren testimoniales nel conxuntu del País. Los melquiadistes se foron definiendo como un partíu d'orde averándose al conservadorismu católicu, reestructuráu políticamente na CEDA, cola que llegaríen inclusive a dir en coalición con motivu de les elecciones de 1933. Asina nel ayuntamientu’l PRLD non solamente refugó les propuestes sociales y económiques que se presentaben dende la esquierda sinón que llegaría a transixir nel llaicismu, ún de les vectores fundamentales del republicanismu hestóricu. Pela so parte'l PRDF en 1931 espunxo un programa social abondu radical pero descartó la posibilidá d’afitar y liderar una mayoría esquierdista nel plenu municipal con otros partíos políticos, yá que adoptó una posición d'aislamientu tácticu mientres la República siguiera siendo «unitaria, no democrática y defensora del capitalismo» (p.160). Esta llínea d’actuación implicaba fuertes tensiones ente la so mocedá, especialmente venceyada al anarcosindicalismu, y la vieya guardia, más moderada, que controlaben respectivamente el comité executivu y el grupu municipal, lo que provocaría la descomposición de la organización. De fechu en 1932 foi espulsáu'l sector más radical, que se reorganizaría como Partíu d'Esquierda Federal. Asina en 1933 la CNT decidió desvenceyase d'un federalismu en clara decadencia y realizó una activa campaña pola astención, qu'en Xixón tuvo cerca del 32%. Finalmente nenguna de los dos fuercies polítiques predominantes en 1931 foi capaz de convertise n'hexemónica, polo que’l so espaciu acabó siendo ocupáu por otros partíos como el PSOE, el PCE, la IR y la UR. Colo cual al llegar 1936 en Xixón imponíase la bipolarización esistente a nivel estatal: asina'l PRDF yera marxináu y escluyíu de les candidatures del Frente Popular quedando nuna posición de testimonialidá, y no que se refier al PRLD, ésti convertíase nuna simple comparsa llocal de la CEDA.

El capitulu VI estudia la progresiva estructuración del movimientu obreru de la ciudá, nel cual si bien siempres esistió un antagonismu ente anarquistes y socialistes, que namás foi superáu en 1934 col establecimientu de l'Alianza Obrera, dende la década de 1910 s'estableció un claru predominiu de la CNT convirtiéndose Xixón nuna isla anarquista nun mar socialista (l'únicu otru bastión cenetista n’Asturies lo constituyía La Felguera). La esplicación del trunfu del anarcosindicalismu podría tar en que mientres el socialismu electoralmente s'enfrentaba a un republicanismu fuertemente enraigonáu na ciudá y realizaba una táctica sindical moderada nes fabriques, la CNT dende'l so ámbitu sindical se permitía xugar un papel socio-políticu mui flexible cooperando nunes ocasiones colos republicanos, y n'otres, presentándose como una alternativa revolucionaria al conxuntu del sistema. Amás un contestu sociollaboral marcáu pola intransixencia de l'Agremiación Patronal tendía a favorecer la radicalidá anarquista. Nesi marcu les diferencies principales na práctica sindical consistíen en que, per un llau, los anarquistes refugaben la intermediación del Estáu na negociación de los conflictos llaborales y consideraben la fuelga como una ferramienta imprescindible dientro del so sindicalismu d'acción directa, mientres que per otru, los socialistes nun solamente defendíen esa intermediación sinón qu’entendíen la fuelga namás como un caberu recursu.

Asina nos años 1910 la CNT consolidó la so infraestructura organizativa con una nueva xeneración de dirixentes llibertarios formaos por Ricardo Mella, ente los cualos inevitablemente destaca Eleuterio Quintanilla. Darréu con una UGT definitivamente marxinada dientro del proletariáu xixonés la CNT foi moderándose y asumiendo munchos de los métodos organizativos socialistes que nel so momentu foron criticaos por autoritarios y burocráticos. Y cuando en 1932 el Manifiesto de los Trenta abra una fuerte resquiebra na CNT estatal al plantegar una estratexa revolucionaria d'acumulación de fuercies al llargu plazu frente a la dinámica insurreccional aniciada pola FAI, anque los dirixentes de la federación xixonesa pol so pragmatismu políticu nun simpatizaben cola FAI nun van intervenir nesi conflictu internu optando por dedicase a fortalecer la so propia organización llocal.

Los capítulos VII y VIII se centren nes cultures polítiques de la oposición asina como la so espansión nel ámbitu de les redes de vida asociativa voluntaria, un espaciu particularmente complexu pero fundamental na llucha de los distintos grupos socio-políticos por establecer el so lideralgu sobre la comunidá acullá de los mecanismos de coacción. Anque los proyectos socio-culturales del republicanismu y del obrerismu compartíen importantes elementos comunes esistía una cuestión na que diverxíen radicalmente: la conceptualización de la llucha de clases. Asina los republicanos minizaben los antagonismos de clase en coherencia cola naturaleza interclasista del so proyectu de nación ciudadana al empar que los obreristes lóxicamente los entendíen como los elementos constituyentes de la so propia cosmovisión.

Dende una perspectiva elitista los intelectuales republicanos se consideraben a sigo mesmos como los axentes portadores del Progresu qu'educaríen a les mases ampliando d'esta manera les bases sociales de los sos proyectos políticos. Poro dende un enfoque paternalista patrocinaron diverses instituciones empobinaes a la clase trabayadora como l'Atenéu Obreru, l'Asociación de Cultura y Hixene o l'Asociación Musical Obrera, pero éstes dempués d'un ésitu inicial, col afitamientu del sindicalismu nos años 1910 van perder gran parte de los sos socios ensin recuperalos hasta que l'endurecimientu de la represión cola dictadura primorriverista les convierta indirectamente en cuarteles d'iviernu. Por embargu l'oxetivu de los sos promotores non solamente nun se vio realizáu sinón que nos años 1930 van ser converties n'espacios dispustaos dende'l mesmu movimientu obreru yá que dellos militantes optaron por confrontar dientro d'ellos colos sos antiguos maestros y los sos valores d'harmonía social.

Nos medios llaborales la CNT que refugaba les xuntes d'arbitraxe del gobiernu llegó a tener un significativu nivel de control que diba dende inspectores propios hasta mecanismos de presión sobre los obreros non sindicaos. Amás la federación anarcosindicalista foi esplegando una serie de midíes más amplies col envís d'organizar al proletariáu tanto dientro como fora de los centros de trabayu anque ensin llegar a crear una esfera pública antihexemónica que cubriera tolos aspectos de la vida social. Y si nel campu de la educación o del ociu les estructures sindicales competíen coles republicanes, nel de la seguridá social nun yera asina, lo que permitió'l desendolcu d'un sistema de sofitu mutuu perfuerte que cubría fallecimientos, enfermedaes y problemes llaborales.

A lo cabero, los capítulos IX y X traten sobre la creación d'una dinámica comunitaria de movilización al traviés de la yuxtaposición de reivindicaciones y acciones sectoriales. Nesa dirección foi especialmente significativa la converxencia en 1909 de tres conflictos motivaos por una xubida de tases de consumu, el costu del tresporte urbanu pa los trabayadores, y l'establecimientu d'una llei que prohibía abrir los chigres nos domingos. Entós s'activaron políticamente delles redes de sociabilidá y s'anició un procesu de cooperación ente sectores mui distintos. Y según se foron multiplicando los conflictos los republicanos empecipiaron a perder terrén en beneficiu de los anarcosindicalistes, qu'en 1914 col oxetivu de canalizar el malcontentu popular fora del ámbitu llaboral auspiciaron una asociación llamada L'Analítica que taba dedicada a demandes de consumu y arriendos. Más tarde nos años 1930, como consecuencia tanto de la incapacidá de los xestores políticos pa consensuar una mediación institucional nos conflictos lo mesmo que de la lentitú o inesistencia de cambios reales, la CNT activó una dinámica de confrontación permanente, lo que convertiría a Asturies na provincia con más fuelgues del Estáu dempués de Barcelona.

Rematando yá, podemos concluyir afirmando qu'esti llibru ye un perinteresante trabayu d'hestoria llocal que nos ayuda a entender dende abaxu, dende Xixón y dende les pequenes (y grandes al empar) lluches cotidianes el procesu de politización de les mases populares nos entamos del sieglu XX, asina como la crisis de llexitimidá institucional que se produz, nuna escalada progresiva de conflictos sociales, na dómina de la II República.